RuokaTutka-materiálaid pedagogalaš vuolggasajit
Ruokatutka materiálaid ovddideami vuolggasadjin leamašan Árabajásgeassinplána vuođustusat, Vuođđooahpahusa oahpahusplána vuođustusat sihke Skuvlaboradanávžžuhus ja Árabajásgeassima boradanávžžuhus. Materiála doarju árabajásgeassinplána vuođustusain muitaluvvon viiddissuorggi čehppodaga oassesurggiid ja biebmobajásgeassima ollašuhttima. Seammá materiála gárvvisteamis leat váldán vuhtii vuođđooahpahusa oahpahusplána vuođustusain ovdanbuktojuvvon viiddissuorggi čehppodaga mihttomeriid. Oahppaávdnasiid guovdu mihttomeriin leat ávkkástallan eandalii biologiija, kemiija, ruovttudoalu, eanandieđu, dearvvašvuođadieđu, servodatoahpu ja birasoahpu mihttomeriid.
RuokaTutka ávkkástallá iđavuđđosaš ja dutki oahppama geahččančiegaid
Materiála duogášjurddan leat ávkkástallan ovddibuid lassin maiddái iđavuđđosaš ja dutki oahppama geahččančiegaid. Dat heivejit mielasteamet hui bures máŋggageahččančiega, muhto seammás maiddái persovnnalaš ja geavatlaš borramušihtagiid guorahallamii.
Iđavuđđosaš oahpahusain ja oahppamiin oaivvildat dávjá oahppaávnnasrájáid rasttildeaddji, dutki vuolggasaji oahppamii. Vuolggasadjin leat dievaslaš, duođalaš máilmmi ihtagat. Dutki oahppan lea pedagogalaš lahkonanvuohki, mas oahppama vuolggasadjin lea iežas ovdagáttuid diđolaš vihkkehallan ja mii sikte ihtagiid čilgemii ja áddemii. Vihkkehallandiliin olmmoš lea dávjá hearki dorvvastit árgadihtui, vaikke dat livččii feaillalaš, go luovusin báhcán dieđalaš dihtui. Teorehtalaš áššiid galggašii dan dihtii gieđahallat maiddái konkrehtalaččat ja geavatlaččat, seammás iežas árgaárvvoštallama ovdagáttuid eahpidemiin. Buoremus vuolggasajit dutki oahppamii leatge oahppiid jearaldagat.
Dutki oahppamis deattuhit sosiálalaččat juhkkojuvvon jierpmi mearkkašumi: earálágan olbmot dievasmahttet nubbi nuppi ja joavku lea jierbmásat go ovttaskasat oktiibuot. Oahpaheaddji doaibman lea veahkehit oahppiid joavkodoaimmas, dieđu ohcamis sihke oktasaš jurddaproseassa oinnolažžan ja áddehahttin dahkamis.
RuokaTutka viiddissuorggi čehppodaga huksemis
Ruokatutkas eandalii guovddáš viiddissuorggi čehppodaga suorggit leat Jurddašeami ja oahppamii oahppama dáiddut, Máŋggalohkandáidu sihke Alddis fuolaheapmi ja árgabeaivvi dáiddut. Mánáid ja nuoraid roahkasmahttet dutki ja luovvi bargovuohkái ja ovttas dahkamii. Sin duvdet dahkat áicamiid sihke ohcat, árvvoštallat, buvttadit ja juohkit dieđu ja jurdagiid. Mánáid iežas jearaldagaide addojuvvo sadji, sin movttiidahttet ohcat vástádusaid, guldalit sierra oainnuid ja seammás guorahallat iežas siskkáldas dieđu.
Biebmotemáide gullet duollet dálle maiddái eahpečielga ja ruossalas dieđut, man krihtalaš guorahallamii dárbbaša roahkasmahttima ja gaskaomiid. Ruokatutka materiálain ávkkástallet speajalvuođa, iskkadallama ja dáidaga eará vugiid nannet eavttuid fuobmámii ja luovvi jurddašeapmái. Dárkkuhussan lea ovddidit gulul máná systemalaš ja ehtalaš jurddašeami. Alddis fuolaheami ja árgabeaivvi dáidduid ovdáneamis guovddážis lea áddejupmi das, ahte váikkuhat ieža doaimmaideametguin sihke iežas ja nuppiid dearvvašvuhtii ja buresbirgejupmái. Mánáid duvdet fuolahit alddis ja nuppiin sihke birrasis ja suvdilis ovdáneamis. Materiála ávkkástallan lasiha dieđu buresbirgejumi ja dearvvašvuođa ovddidan ja hehtten dahkkiin, fállá vejolašvuođa guoddit ovddasvástádusa oktasaš doaibmamis ja lasiha návcca áigehálddašeapmái.
Ruokatutka materiálaiguin sáhttá ovddidit viiddessuorggi čehppodaga surggiin maiddái Kultuvrralaš čehppodaga, vuorrováikkuhusa ja olggosbuktima, Diehto- ja gulahallanteknologalaš čehppodaga, sihke Oassálastima, váikkuheami ja suvdilis boahttevuođa huksema. Biebmu lea nannosit oassin min kultuvrras ja dan bokte sáhttá oahppat iežas kultuvrralaš identitehtas. Ruokatutka bargobihtáin mearkkašahtti oassi čađahuvvo vuorrováikkuhusas earáiguin ja gilvvuin leat siste maiddái olggosbuktima elemeanttat. Materiála ávkkástallan vuođđuduvvá eará vugiin diehto- ja gulahallanteknologiija ávkkástallamii. Mánát duvdojuvvojit materiála vehkiin aktiivvalaš oassálastimii ja váikkuheapmái.
