Borramušbajásgeassin árabajásgeassimis ja vuođđooahpahusas
Riikkaviidosaš vuođđooahpahusa vuođuštusat buktet ovdan skuvlaboradeami mearkkašumi dahkkin, mii doarju dearvvašlaš šaddama ja ovdáneami, oahppannávcca ja borramušmáhtu. Skuvlaboradeapmi vásihuvvo dehálaš bottu dahkkin, mii lasiha veadjima ja buresbirgejumi sihke doarju borramuš- ja láhttenbajásgeassima. Ođđa skuvlaboradanávžžuhusas skuvlaboradeapmi gávnnahuvvo leat oassi skuvla borramušbajásgeassimis. Borramušbajásgeassima sáhttá goittotge ollašuhttit maiddái oassin eará skuvlabarggu.
Maiddái árabajásgeassimis borramušbajásgeassin ollašuhtto boradanbottuid lassin maiddái oassin eará doaimmain. Árabajásgeassima oktan mihttomearrin lea ovddidit máná ollislaš buresbirgejumi ja dearvvašvuođa. Árabajásgeassima boradanávžžuhus “Dearvvašvuohta ja illu borramušas” doaibmá oktan bargoneavvun ja linnjemiid veahkkin borramušbajásgeassima ollašuhttimis. Árabajásgeassima ja vuođđooahpahusa borramušbajásgeassima mihttomearit sáhttet laktásit ovdamearkan borramuškultuvrii gullevaš čehppodahkii, suvdilis eallinvuogi ovddideapmái, borramušvuogádaga dovdamii ja dearvvašvuođa ovddideapmái. Go háliidat deattuhit borramušbajásgeassima dearvvašvuođamihttomeriid, lea vejolaš ávkkástallat maiddái biebmobajásgeassima doahpaga. Dainna oaivvildit pedagogalaš doaimma, man mihttomearrin lea ovddidit oktagasaid ja servošiid borramuššii gullevaš árvvuid, miellaguottuid, dieđuid, dáidduid ja doaibmavugiid ovdáneami guvlui, mii ovddida dearvvašvuođa.
