Skip to content

Skuvlaboradeapmi lea earáge go borramuš

Bures ordnejuvvon skuvlaboradeapmi ovddida hávskesvuođa ja skuvlabarggus veadjima ja botke juohkásit skuvlabeaivvi. Ovttas boradeapmi ovddida vuorrováikkuhusdáidduid ja sosiálavuođa sihke bajásgeassá borramuškultuvrii movttiidahttá árvvusatnit borramuša ja dan dahkkiid. Mihttomearrin lea, ahte juohke oahppi boradivččii ja vásihivččii skuvlaboradeami positiivva dáhpáhussan.

Skuvlaborramuš ja bajásgeassin

Suopma lea áidna riika, gos skuvlaboradeapmi lea laktojuvvon oassin oahpahusplánii. Viidát jurddašettiin skuvlaboradeapmi ja borramušbajásgeassin laktásit máŋgga oahppaávdnasii. Buoremusat skuvlaboradeapmái laktásan áššiid sáhttá bajidit ovdan ruovttudoalu-, biologiija-, dearvvašvuođadieđu- ja lihkadeami oahppaávdnasiin ja máŋggain skuvllain válljenvullosaš oahppaávnnasin fállojuvvon smávvafitnodatdoallit-kurssas.

Borramušbajásgeassin doibmet skuvla oahpahusbargoveahka ja borramušbálvalanbargoveahka. Borramušbajásgeassin lea oassi skuvlabeaivvis ja ollašuvvá buoremusat skuvlaboradeami áigge. Skuvlaboradeapmi, mii doarju oassálastima, sisttisdoallá dearvvašvuođa- ja vierrobajásgeassima, suvdilis ovdáneami oahpaid sihke bargoeallin- ja dorvvolašvuođabajásgeassima. Borramušbálvalusbargoveagas lea guovddáš rolla skuvlaborramušbránda huksemis. Skuvla oahpahus- ja borramušbálvalusbargoveaga ja oahppiid gaskasaš njuovžilis vuorrováikkuhus dahká vuođu bures ollašuhtton skuvlaboradeapmái. Oahppi vánhemat ja skuvla rávisolbmot vástidit bealisteaset skuvlaboradeapmái laktojuvvon positiivva miellaguottuid šaddamis. Miehtemielalaš borramušsáhka ohppojuvvo buorre muddui málleoahppama bokte. Lihkostuvvan skuvlaboradeapmi lea oppa skuvla oktasaš ášši.

Goalmmádas beaivvi energiijas

Skuvlaboradanávžžuhusa (Boradat ja oahppat ovttas -skuvlaboradanávžžuhus, Stáhta biebmanráđđádallangoddi, 2017) mielde albma skuvlamális gokčá sulaid goalmmádasa oahppi beaivválaš energiijadárbbus. Skuvlaborranlistu lea gárvvistuvvon dan láhkai, ahte rehkenastojuvvon biebmoávdnasiid oažžuma mihttomearri ollašuvvá gaskamearálaččat vahku áigge. Skuvlaboradeamis temávahkuid ja -beivviid, bassebeivviid ja sesoŋŋaluonddu vuhtiiváldin buktet skuvlaboradeapmái molsašuddama.

Beaivemállása lassin oahppiide galgá ordnet nuvttá ja álbmái gaskabihtá, jus oahppadiimmut joatkašuvvet beaivemállása maŋŋá badjel golbma diimmu. Máŋggain skuvllain fállet gaskabihtá buot oahppiide mávssu vuostá.

Albma skuvlamális sisttisdoallá mállása buot osiid

Buorre skuvlamállásii gullet liegga borramuš, saláhta, faskkus dahje varasbihttá, láibi, vuodja ja juhkamuš. Mális lea máŋggabealat, dássedettolaš ja álbmái, go buot dan oasit návddašuvvojit rivttes gori mielde. Skuvla bargoveahka, tallearkamálle mielde čohkkejuvvon mállemális dahje govva tallearkamálles láidejit skuvlla oahppiid mállása čohkkemis ja dahkat dearvvašlaš válljejumiid. Skuvlaboradeapmi ordnejuvvo oahppiid ahkeáigodaga ja gáibádusaid mielde, dearvvašlaš šaddama ja ovdáneami ovddidemiin.